Vinner 2026

Kulturprisen 2026 går til Helge Gudheim!

Prisen tildeles Helge for hans arbeid med å formidle tradisjon og kultur. 

Gjennom nesten førti år som journalist i avisa «Valdres» har han laga mange seriar i avisa om byggeskikk, interiør, gamle gjenstandar og fotografi, lokale mattradisjonar, folkedrakter og dialekt. 

Ein av seriane gjekk over 14 år og handla om tradisjonsmaten i Valdres. Gjennom dette arbeidet kom han i kontakt med mange informantar, noko som kom til nytte då han i 2005 starta arbeidet med boka «Kinning, bresting og YSTING I VALDRES sett i norsk og internasjonal samanheng». Boka kom ut i 2013, 541 sider med dokumentasjon av kunnskap som er i ferd med å falle bort. Her er stølsliv, budeier, interiør, gamle gjenstandar og dialekt krydderet i sjølve hovudretten.

Helge har også laga sitt eige vesle ysteri heime hjå seg sjølv, der han held kurs for folk som vil lære å yste.

I 2002 gav han ut boka «Interiør i Valdres», der han gjennom elleve interiør ynskte å syne fram korleis folk bur og ferierer i Valdres.

Dei siste åra har Helge vore medlem og styremedlem i Norsk folkedraktforum. Denne organisasjonen vart stifta i 1995, og arbeider med forskning og dokumentasjon av folkeleg draktskikk, utvikling og produksjon av folkedrakter på grunnlag av historisk kjeldemateriale. I 2021 starta han facebooksida «Bunader i Valdres». Denne driv han sjølv, og har hatt eitt innlegg kvar veke. Alltid noko nytt (les: gamalt) og interessant.